👩‍🦰👹 🤦‍♂️पूनमपांडे इत्यस्याः “सर्वाइकल कैंसर” गर्भग्रीवायां कर्करोगविषये प्रसारित: पाखण्ड: सर्वसाधारणजनैः नैव रुच्यते, चिकित्सकाः प्रत्यपादयन्, अनया गर्भग्रीवायां कर्करोगेण पीड़ितानां महिलाजनानां तु ध्यानं देयम् आसीत्🟡

युवराजवाणी। 32 वर्षवयोमिता अभिनेत्री पूनमपाण्डेय: स्वस्यैव मृत्यो: मुधासूचनां प्रसार्य विवादेषु समापतिता अस्ति। शुक्रवासरे पूनमपाण्डेय: सामाजिक-सञ्चार-सञ्जालेषु निजमृत्यो: सूचनां प्रासारयत्। तस्याः दलस्य माध्यमेन प्रतिपादितं यत् “लॉकअप” इति दूरदर्शनशृङ्खलाया: प्रतिभागिनी सम्प्रति प्राणान् अत्यजत्। सा “सर्वाइकल कैंसर” इति गर्भग्रीवाया: कर्करोगेण पञ्चतां प्राप्ता अस्ति। एषा वार्ता अरण्याग्निरिव सजवं सर्वत्र प्रसारिता अभूत्। सर्वसाधारणजनैः साकमेव अभिनेतृजनैः चापि तस्याः मरणवृत्तान्तं निशम्य दुःखं प्रकाशितम्। किन्तु 24 होराणाम् अनन्तरं अभिनेत्री पूनमपाण्डेय: साक्षात् स्वयमेव प्रकटीभूय प्रावोचत् यत् सा जीविता वर्तते। सा स्वस्था वर्तते, नहि सा गर्भग्रीवाया: कर्करोगेण पीडिता अस्ति। अनया एषः मुधोदन्त: एकस्य अभियानस्य कृते प्रसारित: आसीत्। परन्तु पूनमपाण्डेयाया: अनेन कृत्येन नैके डॉक्टर्स इति द्राक्तरा: अपि विस्मिताः सन्ति। ये खलु पूनमपाण्डेयाया: अस्मिन् कुकृत्ये विस्मयं प्रकटयन्तो वर्तन्ते। पूनमपाण्डेयाया: एतत् कृत्यं न हि जनसामान्यै: न च विशिष्टै: जनैः रोरुच्यते। एतावदेव नैव “ऑल इंडियन सिने वर्कर्स एसोसिएशन” इत्यनेन संघटनेन तु पूनमपाण्डेयां विरुध्य तस्या: प्रबन्धकं च विरुध्य “FIR” इति प्राथमिकीपञ्जी करणस्य यच्ञापि कृतास्ति। अपरत्र च पूनमपाण्डेयाया: एतस्मिन् कृत्ये द्राक्तरै: (डॉक्टर्स) प्रोद्यते यत् पूनमपाण्डेयया कैंसर इति कर्क-रोगिणां विशेषतश्च “सर्वाइकल कैंसर” इति गर्भग्रीवाया: कर्करोगेण पीड़ितानाम् उपहास: कृत: अस्ति। एतद्धि गम्भीरं प्रकरणमस्ति। अनेन कृत्येन समाजे नैतिक-पतनस्य चिन्ता समुत्पदिता अस्ति। तस्याः एष: व्यवहारः अतीव अंसवेदनशील: अस्ति। युगपदेव ये जनाः एतया घातककर्करुजा प्रपीडिता: सन्ति तेषु जतेषु अनेन कृत्येन नैराश्यमपि वर्धतेतराम्। जनानां मानसेषु भयमपि प्रसारयति। एतादृशेण व्यवहारेण कर्करोगेण युध्यमानेषु रोगिजनेषु नकारात्मकतापि प्रसार्यते। एष: एक: गम्भीर: रोग: अस्ति अत: अस्योपचारे सकारात्मकता अपेक्ष्यते। किन्तु पूनमपाण्डेया एतद्विषये उपहासमेव कृतवती।