संस्कृतम् आत्मज्ञानस्य भाषा – प्रान्तप्रचारकः श्रीमान् नरेन्द्रः

अजय कुमार:- होशियारपुरम्, साधु-आश्रमः – संस्कृतभारतीपञ्जाब आयोजितस्य साप्ताहिकस्य आवासीयस्य संस्कृतवार्तालापशिबिरस्य उद्घाटनं होशियारपुरे साधु-आश्रमे अभवत्। सम्पूर्णपञ्जाबतः प्रायः ४० प्रशिक्षुणः शिबिरे भागं गृहीतवन्तः ।

मुख्यातिथिरूपेण उपस्थितः राष्ट्रीयस्वयंसेवकसंघस्य पञ्जाबप्रान्तस्य प्रचारकः नरेन्द्रजी स्वसम्बोधने अवदत् यत्, “संस्कृतम् आत्मज्ञानस्य भाषा अस्ति। अद्य भारतस्य युवभिः स्वभाषायाः, ज्ञानस्य, देशस्य, परम्परायाः च विषये ध्यानं दातव्यम्। यावत् युवकाः संस्कृतं न जानन्ति तावत् ते स्वराष्ट्रस्य परम्पराः, भारतीयत्वस्य मौलिकभावना: च अवगन्तुं न शक्नुवन्ति।” अतः सर्वैः युवकै: संस्कृतम् अधिगन्तुं प्रयतितव्यम्।”

मुख्यवक्ता उत्तरक्षेत्रपत्राचारप्रमुखः सुशीलमहोदयः अवदत् यत् संस्कृतं कस्यापि एकस्य प्रदेशस्य भाषा नास्ति, अपितु सर्वेषां दक्षिण-एशियायाः निधिः अस्ति। उदाहरणानि उद्धरन् सः अवदत् यत् अधुना पाकिस्तानस्य एकस्मिन् विश्वविद्यालये अपि संस्कृताध्ययनम् आरब्धम्, एतेन ज्ञायते यद् दक्षिण-एशियायाः संस्कृतं प्रति आदरः, स्नेहः च वर्तते इति ।

कार्यक्रमस्य अध्यक्षता विश्वेश्वरानन्दविश्वबन्धुसंस्कृतभारतभारत्यनुशीलनसंस्थायाः विभागाध्यक्षा, संस्कृतभारत्याः होशियारपुर-जनपदाध्यक्षा प्रो. ऋतु बाला सर्वेषां अतिथीनां स्वागतं कृतवती। डॉ. नीरजः कार्यक्रमस्य प्रास्ताविकं प्रस्तुतवान्। सरस्वतातिथि: श्रीमान् अजयकुमारः आर्यः सारस्वतवचोभिः धन्यवादज्ञापनं कृतवान्। डॉ. ओमनदीपः, डॉ. तेजप्रकाशः च मञ्चसञ्चालनं कृतवन्तौ।

एतदवसरे होशियारपुरतः अनेके गणमान्याः उपस्थिताः अभवन्, येषु श्रीमान् भगवतीप्रसादः, श्रीमान् सर्वेशचड्ढा, गगनदीपपाठकः, प्रो.कन्हैयालालपराशरः, पं.ओंकारः, श्रीमान् हरीशखोसला, श्रीमान् दीपकवालियाः, कार्यक्रमाय आगताः संस्कृताध्येतारः सम्मिलिताः अभवन्।